കുടയുംചൂടിനിന്ന് മേക്കാറ്റുകളെക്കൊണ്ട് മേഘക്കടങ്കഥക്കെട്ടുകൾ ചുമപ്പിക്കുന്ന കടങ്കഥമുതലാളിയായ ആകാശത്തോട് ഞങ്ങളുടെ ആറ്റുവക്കത്തെ കുഞ്ഞിക്കാറ്റു വിളിച്ചുപറഞ്ഞു :
“ ഇറക്കിക്കെ....ഇറക്കിക്കേ…. ഒരു കടങ്കഥയിറക്കിക്കേ……നോക്കട്ടെ-!”
അന്നു വല്ല്യകോളൊന്നുമില്ലാത്തതുകൊണ്ടോ എന്തോ
അതുകേട്ടപ്പോഴേ നിരനിരയായി നീങ്ങുന്ന പലതരം കടങ്കഥച്ചുമടുകൾക്കിടയിലൂടെ ഒരു
ചിരിയും ചിരിച്ചുകൊണ്ട് ആകാശം ഞങ്ങളുടെ ആറ്റുകടവിലേക്കിട്ടുതന്നു.. ഒരു കടങ്കഥ--!
ആറ്റുകടവിലെ വെള്ളത്തിൽ കാല് നനച്ചുനിന്ന കടങ്കഥയുടെ
കാവിക്കുപ്പായത്തിലേക്കു നോക്കി ഞങ്ങളിരിക്കെ കടങ്കഥ പറഞ്ഞു -: “ചിന്തയിൽപ്പെട്ടുപോയിരിക്കുന്നു
എന്നതാണു മനുഷ്യൻ എന്ന ഈ സങ്കടക്കടങ്കഥയിലെ പ്രശ്നം -! ചിന്തയിൽ നിന്നെങ്ങനെ കരകയറും-? ലളിതമാ…..ഒന്ന് ശ്രമിച്ചു
നോക്ക്—! ”
അതോടെ ഞങ്ങൾ ശ്രമംതുടങ്ങി…. എത്ര
ചിന്തിച്ചിട്ടും ഒരു പോംവഴി കാണുന്നില്ല….! എന്താ-!
വല്ലതുമൊരുവഴി തോന്നുന്നോ.--!! ശ്രമിച്ചു നോക്ക്… ‘പയങ്കര’ ഓഫറാ--!!
-മധു,മുട്ടം
