ഈണമുള്ള കത്തുകൾ

അകലെയെങ്ങോ  ഉള്ളൊരാരാധികേ....

അഭിനന്ദനങ്ങൾക്കു നന്ദി...      എന്റെ

കുറുമൊഴിച്ചിന്തു നിൻ കിളിമൂളാറുണ്ടെ-

ന്നറിയിച്ച കത്തിനു നന്ദി.....  നിന്റെ

അനുമോദനങ്ങൾക്കും  നന്ദി.....

അറിയില്ല നമ്മൾ കണ്ടാലൊരിക്കലും

അറിയില്ല തമ്മിലെന്നാലും....തെല്ലു-

മറിയില്ല തമ്മിലെന്നാലും...

അറിയുന്നു ഞാൻ നിന്റെ കനവിന്റെയരിമുല്ല-

ക്കൊടിയെത്ര മൊട്ടിട്ടുവെന്നും..... നിന്റെ

മനമെത്ര പൂവിറുത്തെന്നും..... ആ

മിഴിയെത്ര മാലകോർത്തെന്നും....!

ഒരു കൊച്ചുകത്തിൻ നാക്കിലത്തുമ്പിൽ നീ 

ഹൃദയംവിളമ്പിനിന്നെന്നും .... അതിൽ 

മധുരം തുളുമ്പിനിന്നെന്നും....

അതിലിറ്റ കണ്ണുനീർപ്പാടുകൾ കാണ്‍കെ നിൻ

മിഴിയൊപ്പി ഞാനിരുന്നെന്നും....നിന്റെ

കവിളൊപ്പി ഞാനിരുന്നെന്നും 

അറിയില്ലൊരു വഴിയമ്പലം തന്നിൽ നാ-

മഭിമുഖം വന്നിരുന്നാലും.....!

എന്നാലും....

അറിയുന്നു ഞാൻ പ്രിയസഖി നിന്റെ സങ്കല്പ-

മലർവനി പൂക്കുന്ന കാലം....!

അതിലൊരു പൂങ്കുയിലായ് വന്നിരുന്നു ഞാൻ

മധുരമായ് പാടുന്ന നേരം

അതുകേട്ടു നീയെന്നെത്തിരയും. സ്മരണകൾ

തളിരിടും കൊമ്പുകൾ തോറും.....!

അവിടന്നീ പാട്ടിന്റെ പല്ലവി നിൻ ചുണ്ട-

ത്തറിയാതെ തേൻപോലെയൂറും...
അറിയുമന്നേരം നാം കാണാത്തോരെങ്കിലും 
പിരിയാറില്ലെന്നിരുപേരും.....! നമ്മ-
ളിരുപേരല്ലെന്നുള്ള നേരും .....!!
                                    -മധു,മുട്ടം