തെക്കൻകാറ്റിന്റെ പൂവിളി

തെക്കൻ കാറ്റിന്റെ പൂവിളി മാഞ്ഞല്ലോ

തെക്കിനിക്കോലായിലാളും പിരിഞ്ഞല്ലോ

ഒറ്റക്കുനീയെന്തിനിപ്പോഴുമീക്കളി-

മുറ്റത്തു വന്നിരിപ്പൂ….!? മൂകമീ

മുറ്റത്തു വന്നിന്നിരിപ്പൂ….!?

ഇന്നലെ ഈ ഓണമുറ്റത്തു നീയൊരു

പൊൻ‌കതിരെന്നപോൽ വന്നു നിൽക്കെ

പൂമുഖത്തൂണും ചാരി നിന്നെ നോക്കി

പൂവമ്പനെന്തോ കൊതിച്ചു നിൽക്കെ..ആ 

പൂവമ്പനെന്തോ കൊതിച്ചു നിൽക്കെ

നിന്റെ മോഹത്തിന്റെ നേത്രോല്പലമാല

എന്തേ ചാർത്താൻ മറന്നുപോയ് നീ..!? അവ-

നെന്തേ മൂകം പിരിഞ്ഞുപോയി..!?

ഇന്നലെ നിൻ കിനാപ്പൂക്കുലചിന്നിയ

പൊന്നോണത്തുമ്പിതുള്ളാക്കളത്തിൽ

ഇന്നെന്തേ തേടുന്നു നിൻസ്വപ്നശാരിക

മങ്ങാത്തൊരോർമ്മതൻ തേനല്ലിയോ-നിന്റെ

മങ്ങിയ സ്വപ്നത്തിൻ പൂവല്ലിയോ…?

തെക്കേമുറ്റത്തെ പൂക്കളം മാഞ്ഞല്ലോ..

മുത്തശ്ശിപ്ലാവിലെ ഊഞ്ഞാലഴിഞ്ഞല്ലോ..

അക്കരെ അമ്മാത്തൂന്നുള്ളോരും പോയല്ലോ..

ഒറ്റക്കുനീയെന്തിനിപ്പോഴുമീക്കളി-

മുറ്റത്തു വന്നിന്നിരിപ്പൂ….!? മൂകമീ

മുറ്റത്തു വന്നിന്നിരിപ്പൂ….!?

                                         -മധു,മുട്ടം