അഭിനന്ദനം

 

ഇമ്മണിത്താലത്തിലെ 

അരിയിൽ ‘ഹരി ’യെന്നാ-

യമ്മിണിക്കുഞ്ഞേ നീയി-

ന്നക്ഷരത്തുമ്പിൽത്തൊട്ടോൾ…!

അമ്മതൻ സാരിത്തുമ്പു 

വിട്ടിട്ടു കുഞ്ഞേ ജഗ-

ദംബതൻ ചേലത്തുമ്പ-

ത്തല്ലോ നീ പിടിച്ചുപോയ്…!!

                              --മധു,മുട്ടം

 

സതീർത്ഥ്യൻ

            

ഹരിനാമമുതിരുമീ നാവും..,ദു:ഖ-

വനമാല കോർക്കുമീ മനവും..

അറിയാതെ നിറയുമീ മിഴിയും…തെല്ലു-

മറിയില്ലേ കണ്ണാ ഇനിയും…..?

ചിരകാലമോഹങ്ങളോടെ ദൂരെ

അരമന നോക്കി ഞാൻ നിൽ‌പ്പൂ.

അവിലുമായങ്ങേറി വന്നാൽ ആഴി-

മകളറിയില്ലേ കണ്ണാ…..!?

നടയിൽ നിൻ അപദാനം പാടി ഞാൻ

തളരുമ്പോൾ താമരക്കണ്ണാ

തിരുമറുകൊളിയേലും മാറിൽ ചേർത്തു

തഴുകില്ലേ മുകിൽവർണ്ണാ.

                             -മധു,മുട്ടം