നീ മാത്രം

കാണുമ്പോൾ തമ്മിൽ കയർത്തേക്കുമെങ്കിലും കണ്ടിരിക്കുമ്പോൾ കലമ്പുമെന്നാകിലും കാണാത്ത നേരത്തെ പ്രാർത്ഥനാവേളയിൽ നീ മാത്രമാണെന്നിൽ നിത്യനിരഞ്ജനേ….                                                         -മധു,മുട്ടം

ചില ചില മോഹങ്ങൾ...

ചില ചില മോഹങ്ങൾക്കു 

ചിലമ്പുണ്ടോ….!?കാലിൽ

കിലു കിലെ കിലുങ്ങുന്ന 

കിങ്ങിണിത്തളയുണ്ടോ…..!?

തളയിട്ടു കരളിന്റെ

തളമാകെ ഓടിയോടി

ഒളിവിൽ‌പ്പോയ് മണിചിന്നും

ചിരിയുണ്ടോ…!?മായാ-

മറയിൽ നിന്നൊളികണ്ണാൽ 

കളിയുണ്ടോ…!?

                  (ചില..ചില..

അരയിൽ കിങ്ങിണിയുണ്ടോ…!?.

നെറുകയിൽ പീലിയുണ്ടോ….!?

ഒരുകൈയിൽ കുഞ്ഞോട-

ക്കുഴലുണ്ടോ……!? മെയ്യിൽ

മരതക മണിവർണ്ണ-

പ്പൊലിമയുണ്ടോ….!?

                   (ചില..ചില..

ഇടയിൽ  വിങ്ങുന്ന നെഞ്ചിൻ

യമുനാ തീരത്തൊരു

ഇടയനെപ്പോലുള്ള

വരവുണ്ടോ….!?ഓട-

ക്കുഴലൊലിയമൃതാലെ

തഴുകലുണ്ടോ…!?

                (ചില..ചില..

                  -മധു,മുട്ടം

 

                      

ത്രേതായുഗം വീണ്ടും പിറന്നാൽ

ത്രേതായുഗം വീണ്ടും പിറന്നാൽ

ത്ര്യംബകം വീണ്ടുമൊടിഞ്ഞാൽ

രാമായണത്തിലെ നായിക വീണ്ടും

മായാ മാനിനെ കാണും- വാല്മീകി-

മാമുനി അതുകണ്ടു ചിരിക്കും-!

         (ത്രേതായുഗം വീണ്ടും...

അംബുജലോചനനന്നും പ്രിയതൻ

ചില്ലിവില്ലേറ്റകലും…

പണ്ടു മുഴങ്ങിയ 

നിലവിളിവീണ്ടും

പഞ്ചവടികേട്ടു നടുങ്ങും…

ആ സ്വരമറിയും 

അനുജനു മൈഥിലി

ആദ്യപ്രഹേളികയാകും…         

             (ത്രേതായുഗം വീണ്ടും...

ദണ്ഡകകാനന വനിയിൽ വിതുമ്പി

*ത്ര്യംബകോൽത്ഭവ ഒഴുകും..

രണ്ടുയുഗങ്ങളിൽ 

സേതു ഉയർത്തി

തമ്പി തളർന്നു മയങ്ങും…

ആ മലരടികൾ

രാമൻ മിഴിനീർ

പാദ്യം കൊണ്ടു കുതിർക്കും….

             (ത്രേതായുഗം വീണ്ടും...

                       -മധു,മുട്ടം

--------------------------------

* ഗോദാവരി നദി